Панкреасот е еден од најважните органи во телото, но многумина почнуваат да обрнуваат внимание на неговото здравје дури кога ќе се појават проблеми. Лекарите предупредуваат дека начинот на исхрана има големо влијание врз неговото функционирање, а современиот стил на живот, брза храна, слатки и преработени производи, често го доведува до преоптоварување.

Овој орган има клучна улога во варењето на храната и регулацијата на шеќерот во крвта. Панкреасот произведува ензими кои ги разградуваат мастите, протеините и јаглехидратите, како и хормонот инсулин кој го контролира нивото на гликоза. Кога постојано е изложен на лоша исхрана, неговото функционирање може да ослабне, што го зголемува ризикот од панкреатитис и дијабетес тип 2.

Лекарите особено предупредуваат на неколку видови на намирници кои можат да претставуваат проблем:

Храна богата со рафинирани шеќери– газирани пијалаци, индустриски слатки и грицки често содржат големи количини скриен шеќер. Панкреасот мора да лачи повеќе инсулин, што долгорочно може да доведе до инсулинска резистенција.

Пржена и масна храна– помфрит, пржено пилешко и други јадења богати со заситени масти го оптоваруваат дигестивниот систем и можат да го зголемат ризикот од воспаление на панкреасот.

Преработено месо – колбаси, салами и слични производи содржат многу заситени масти и сол, што дополнително го оптоварува метаболизмот.

Трансмасти – се наоѓаат во многу индустриски производи како колачи, маргарин и печива и се поврзани со поголем ризик од метаболички нарушувања.

Стручњаците нагласуваат дека не треба да се занемари ниту алкохолот, бидејќи прекумерната консумација може да предизвика оштетување на панкреасот и да доведе до акутен панкреатитис.

За зачувување на здравјето на овој орган, се препорачува исхрана богата со овошје, зеленчук, интегрални житарки, риба и ореви. Исто така, важни се редовна физичка активност, доволно течности и умереност во исхраната.

Лекарите потсетуваат дека симптоми како болка во горниот дел на стомакот, надуеност или проблеми со варење може да бидат знак дека панкреасот не функционира како што треба, поради што е важно навреме да се реагира и да се обрне внимание на секојдневните навики.