Денеска заврши 45 издание на традиционалниот одбојкарски меморијален турнир „Бранко Хаџииљоски – Чајка“, во завршната битка за трофејот македонската сениорска репрезентација загуби од Словачка со 1:3.

Словаците кои исто така се учесници на претстојното Европско првенство се покажаа како доста силни противници и на крајот дојдоа до трофејот со две победи, откако претходно со 3:0 ја совладаа Црна Гора.

За избраниците на селекторот Душко Николиќ, после стартниот триумф над Црногорците (3:1), ја загубија денешната битка, но секако беше одличен тест на можностите пред настапот на континенталниот собир кој ќе го стартуваме на 1 септември во групата „Ц“ против еден од домаќините на ЕП, Финска, во Тампере.

На турнирот „Чајка“ Македонија требаше да има уште еден контролен меч против Израел, но оваа селекција го откажа настапот во СЦ „Борис Трајковски“ поради позитивни случаи на ковид-19 во својот состав.

На денешниот дуел Словачка го освои првиот сет со 25:17, па успеавме да израмниме на 25:21. Во рамките од третиот сет имавме убава можност да поведеде со 2:1, на семафорот стоеше високи 17:9 за нас, и наместо да се искористи овој значаен момент, се дозволи голем пресврт на гостите кои на крајот со 25:22 беа подобри од третиот сет, а со ист резултат го освоија и четвртиот.