Автомобил целосно изгоре во пожар кој избувна додека возилото било во движење. Инцидентот се случи на обиколницата кај клучката во скопската населба Радишани.

Од Министерството за внатрешни работи за „Слободен печат“ потврдија дека возилото го управувала жена која, за среќа, поминала без повреди. Според првичните информации, возилото се запалило во движење.

Видео од запаленото возило сподели порталот „Маркукуле“ на својата фејсбук-страница, каде што на снимката се гледа како густ црн чад и пламен целосно го голтаат луксузниот автомобил „порше кајен“.

Објавата на социјалните мрежи веднаш предизвика бројни коментари од граѓаните – додека едни критикуваат за недостиг на противпожарни апарати во возилата, други дебатираат за причините за пожарот, кои допрва треба да се утврдат по увидот на надлежните служби.

Поради инцидентот, сообраќајот на овој дел од обиколницата се одвива со забавено темпо.

ФОТО | Во пожарот кај Визбегово горат стари коли на приватен имот