Становите на поранешниот премиер Никола Груевски во комплексот „Панорама резиденс“, запленети во случајот „Плацови на Водно“ повторно се понудени на продажба. Државата ќе организира разгледување на луксузните апартмани на 16 јули, а јавното наддавање е закажано за 29 јули.

Два од апартманите се посебно пространи — имаат станбена површина од по околу 200 квадратни метри, како и тераси од нешто помалку од 50 квадратни метри. Според почетната цена од 850.000 евра или околу 4.250 евра по квадрат, јавното наддавање практично ќе биде резервирано за милионерите. Нешто поевтин, но и помал, е третиот апартман, со површина од околу 150 квадратни метри и балкон од 95 квадратни метри. Неговата почетна цена е 760.000 евра.

Државата се надева на најмалку 2,46 милиони евра за трите стана. На фотографиите кои ги објави Агенцијата за управување со одземен имот, се гледаат широки простории, големи тераси, луксузна опрема, џакузи на тераса и панорамскиот поглед кон Скопје. Два од апартманите и претходно биле понудени на продажба, но обидите завршиле без купувач. Државата пред околу една година успешно продаде два други стана на Груевски, на улицата „Бихаќка“ во центарот на Скопје.

Недвижностите беа одземени по судската постапка за „Плацеви на Водно“, во која поранешниот премиер Никола Груевски беше осуден на девет години затвор. Случајот се однесуваше на незаконско присвојување 1,3 милиони евра од партиски донации и нивно користење за купување земјиште и изградба на недвижности.

„Пламнаа“ становите на Груевски на „Бихаќка“, нема интерес за многу поскапите апартмани на Водно