Актерот Роберт де Ниро упати остри критики кон американскиот претседател Доналд Трамп, обраќајќи се на протестот „Без кралеви“ (No Kings) во Њујорк.

Де Ниро порача дека Трамп претставува сериозна закана за американските слободи и безбедност и дека мора итно да биде запрен.

„Кога толпата извикува ‘нема кралеви’, јас слушам ‘нема Трамп’. Имало претседатели кои ги тестирале границите на својата моќ, но никој не бил толкава закана за нашите слободи како тој. Треба да се запре, и тоа веднаш“, изјави актерот.

Тој го обвини Трамп и за политиките поврзани со имиграцијата, како и за надворешната политика, оценувајќи дека има „желба да владее како тиранин“.

Во продолжение од говорот, Де Ниро ги критикуваше и политичарите кои го поддржуваат претседателот.

„Не може да ги прави сите тие работи без поддршка од Конгресот и луѓето во неговата администрација. Тие се со него затоа што се плашат да не ја изгубат моќта и позициите. Тоа е застрашувачко. Како е можно ова да се случува?“, рече тој.

Актерот и претходно јавно повикувал на спротивставување на Трамп. На почетокот од годината емотивно говореше дека претседателот „ја уништува“ Америка.

„Ова е нашата земја, а Трамп ја уништува. Којзнае од кои причини, но тоа е болесно и целосно изопачено“, изјави тогаш.

Од друга страна, Трамп често возвраќа со остри коментари кон Де Ниро и неговите критичари. Во еден од своите говори, тој го нарече актерот „опседнат“ и го оцени како личност која „не знае што зборува“, додавајќи низа навредливи квалификации на негова сметка.

ВИДЕО | Роберт де Ниро повика на отпор кон Доналд Трамп: „Тој е непријател на Америка“