Имено, турнирот ќе биде организиран во насока на подобрување на условите на одбојкарската федерација со обезбедување на три силни репрезентации, гости на турнирот.
На прес конференцијата организирана во Агенцијата за млади и спорт, директорот Дарко Каевски го изрази своето задоволство за упорноста на челните луѓе на одбојкарската федерација и семејството Хаџи Иљоски во одржување на континуитет на една ваква традиционална манифестација.

– Во интерес на одбојкарската репрезентација оваа година концептот на турнирот е поинаков, но и квалитетот на тимовите е на многу повисоко ниво. Гостувањето на репрезентации од светскиот врв на одбојката, како Бугарија, Белгија и Украина е уште една причина за повик до сите вљубеници на спортот викендов да ја посетат салата во градскиот парк и да ги поддржат нашите одбојкари – потенцираше Каевски.

На прес конференцијата свои излагања имаа претседателот на одбојкарската федерација, Петар Јовановски, генералниот секретар Зоран Карановиќ и претседателот на организациониот одбор на турнирот, Ивица Хаџи Иљоски.

Во полуфиналето в петок, од 17.30 часот македонскиот национален состав ќе игра со Украина, а од 20.15 ќе се сретнат Бугарија и Белгија. Во истите термини в сабота се планирани мечот за третото место и финалето.