Со одигрувањето на двата денешни реванш осминафинални натпревари во ракометната Лига на шампиони, познати се сите учесници и двојки во четвртфиналето.

Екипата на ПСЖ е последна која обезбеди пласман во четвртфиналето откако во реваншот ја оправда фаворитската улога славеше со 37:30 над Елверум. Првиот натпревар во Норвешка заврши без победник 30:30.

Најрапсоложени за игра кај „светците“ беа поранешниот вардарец Кристопанс со седум гола, Конку со шест, а Пранди и Никола Карабатиќ дадоа по четири гола. Во редовите на Елверум, одличен беше Мое Нилсен со 10 постигнати голови. ПСЖ во двомечот за пласман на завршниот фајнал-фор ќе игра против германски Кил.

Актуелниот европски шампион Барселона денеска го доби противникот во четвртфиналето, тоа е германскиот Фленсбург кој успеа да ја зачува предноста од четири гола од првиот натпревар и во реваншот на гости кај Пик Сегед загуби со минимални 36:35.

Унгарците во финишот имаа предност од три гола (33:30), но гостите успеаја да искористат неколку грешки во нападот на домашниот тим да фатат резултатски приклучок кој на крајот им донесе минимален пораз и пласман во четвртфиналето.

Фримел со шест и Габер со пет гола беа најдобри кај Пик Сегед, додека во редовите на Фленсбург се истакнаа Годфридсон со седум и Гола со шест гола.

Претходно, Веспрем го доби двомечот со Вардар (30:22, 31:31) и си закажа пресметка со европскиот вицешампион Алборг, додека Виве Киелце ќе игра против Монпелје кој пак беше подобар од Порто (29:29,35:27).

Првите четвртфинални натпревари ќе се играат на 11 мај, а реваншите на 18 мај, додека предноста на домашен терен, односно реваншите пред своите гледачи ќе ги играат Киелце, Алборг, Кил и Барселона.