Кристијано Роналдо наводно ќе стави крај на својата репрезентативна кариера по уште еден, последен натпревар за Португалија. Според последните информации, легендарниот напаѓач ќе се прости од националниот тим на дуелот против Велс во Лигата на нации, со што ќе ја заврши историската кариера во дресот на Португалија.

Доколку ова се потврди, натпреварот на 24 септември ќе биде последната можност навивачите да го видат Роналдо во дресот на Португалија.

Жесус му подготвува збогување на Роналдо?

Иако не зборуваше директно за неговото повлекување, новиот селектор Жорже Жесус порача дека нема веднаш да ја подмладува репрезентацијата. Според португалските медиуми, токму тоа ќе му овозможи на Кристијано Роналдо да се прости од националниот тим на натпреварот против Велс.

Репрезентативна кариера за историја

Доколку се пензионира по натпреварот со Велс, Роналдо ќе ја заврши репрезентативната кариера со неверојатни бројки.

Во дресот на Португалија одигра 233 натпревари и постигна 146 голови – рекорди кои засега никој не успеал да ги достигне.

Со репрезентацијата ја освои европската титула во 2016 година, како и две титули во Лигата на нации во 2019 и 2025 година.

Иако има 41 година, Роналдо останува активен во клупскиот фудбал, а договорот со Ал Наср му трае до летото 2027 година.

Шест Мундијали, но титулата никогаш не ја освои

Светското првенство отсекогаш било најголемата неостварена желба во кариерата на Кристијано Роналдо. Во шест настапи на Мундијалите имаше различни приказни – од блескави моменти до големи разочарувања.

Германија 2006

На своето прво Светско првенство, тогаш 21-годишниот Роналдо беше еден од најдобрите играчи на Португалија. Постигна еден гол, а неговата селекција стигна до полуфиналето, каде беше елиминирана од Франција.

Јужна Африка 2010

Португалија испадна во осминафиналето од Шпанија. Роналдо повторно постигна само еден гол, а тимот имаше големи проблеми во нападот.

Бразил 2014

Иако беше во најдобрите играчки години, ова беше едно од неговите најслаби Светски првенства. Португалија испадна уште во групната фаза, каде што Роналдо постигна само еден погодок.

Русија 2018

Ова беше неговиот најдобар Мундијал. Хет-трикот против Шпанија останува еден од најлегендарните настапи во историјата на Светските првенства. Сепак, Португалија беше елиминирана во осминафиналето од Уругвај.

Катар 2022

Роналдо веќе не беше незаменлив. Постигна само еден гол, а селекторот Фернандо Сантош го остави на клупата во победата против Швајцарија во елиминациската фаза. Португалија доживеа пораз од Мароко во четвртфиналето.

САД, Канада и Мексико 2026

И покрај одличните настапи во Лигата на нации, Роналдо не успеа да остави значителен белег на Светското првенство. Португалија беше елиминирана во осминафиналето од Шпанија, а многумина го критикуваа селекторот Роберто Мартинез што го оставаше на теренот сите 90 минути и покрај очигледниот пад во формата.

Што следува?

Иако репрезентативната кариера се ближи кон крајот, Роналдо сè уште има една голема цел.

Во моментов има 976 голови во професионалната кариера, а неговата амбиција е да стане првиот фудбалер кој ќе стигне до 1.000 официјални голови пред конечно да ги закачи копачките.

Трагичарот на Аргентина се огласи и не се извини: Има работи што се поважни од резултатот…