По завршувањето на Светското првенство, eден од најпознатите и најконтроверзните англиски фудбалски судии, Ентони Тејлор, официјално стави крај на својата судиска кариера.

Тејлор соопшти дека се повлекува од професионалното судење, со што ја заврши 20-годишната кариера во која судеше на вкупно 831 натпревар.

Четириесет и седумгодишниот Англичанец, кој пред да стане судија работел како затворски службеник, влезе во англиската Фудбалска лига во 2006 година. Последниот натпревар во кариерата го судеше на 6 јули 2026 година, кога Шпанија со 1-0 ја победи Португалија во осминафиналето на Светското првенство.

Осврнувајќи се на своето заминување, Тејлор истакна дека судењето на највисоко ниво е огромна чест, но и работа исполнета со постојан притисок, пренесува „Гол.ком“.

🚨 OFFICIAL: Anthony Taylor retires from pro officiating.

“It’s been an immense privilege”. pic.twitter.com/sy6TqOEOQ2

— Fabrizio Romano (@FabrizioRomano) July 21, 2026

„Да се суди на највисоко ниво е огромна привилегија, но притисокот е огромен, а секоја одлука е под лупа. Сметам дека сега е вистинскиот момент да се повлечам и да започнам ново поглавје во мојата кариера“, изјави Тејлор.

Во текот на кариерата, Тејлор беше главен судија на финалето на Лига купот во 2015 година, финалето на Лига Европа во 2023 година, а доби и бројни пофалби за смирената реакција на натпреварот Данска – Финска на ЕП 2020, кога Кристијан Ериксен колабираше на теренот.

Конфликтот со Жозе Мурињо

Иако зад себе има импресивна кариера, Тејлор не беше поштеден од контроверзии. Најпознатиот инцидент се случи по финалето на Лига Европа во 2023 година, кога тогашниот тренер на Рома, Жозе Мурињо, го пресретнал на паркинг и двапати му извикал: „Срамота!“.

Тејлор подоцна призна дека тоа било најнепријатното искуство во неговата кариера.

„Тоа беше најлошата ситуација со која сум се соочил во однос на навреди. Особено затоа што со мене беше и моето семејство“, изјави тој.

Што следува?

Тејлор се пензионира со 163 меѓународни натпревари и репутација на еден од најдоверливите, но и најчесто анализираните судии во светот.

Иако сè уште не откри што ќе работи понатаму, се очекува да остане дел од фудбалот во некаква улога.

ВИДЕО | Шпанците го понижија Роналдо на големата прослава во Мадрид