Ник Рајнер, кој е обвинет за убиството на своите родители, во моментов се наоѓа во притвор и е ставен под посебен надзор. Како што пренесува „Пејџ Сикс“ , полициски извор изјавил дека кај Рајнер постои изразен ризик од самоубиство, поради што е сместен во самица, каде што е задолжен да носи сина заштитна наметка.

Според претходните информации, на Рајнер му била дијагностицирана шизофренија пред убиството на неговите родители, Роб и Мишел Рајнер. Во неделите пред злосторството, тој се однесувал непредвидливо и опасно. Иако и претходно бил под надзор на психијатар поради ментална болест, неговото однесување во месецот пред убиствата станало „алармантно“.

Дозволено му е да комуницира исклучиво со својот адвокат и со затворските службеници. Напуштање на ќелијата му е овозможено само поради појавување на суд или од медицински причини.

„Ова е важно за да не се загрози случајот и за да се спречи кој било затвореник да му поставува прашања, како на пример зошто ги убил своите родители“, се вели во изјавата.

Рајнер ќе остане сам во ќелијата во текот на целиот период, а неговата дневна рутина е строго контролирана. Контактот со надворешниот свет практично не постои. Лекари и експерти за ментално здравје утврдиле дека тој има „ментална попреченост“.

„По пристигнувањето во затвор, лекарите го прегледаа и утврдија дека постои ризик да си наштети. Тој ќе остане под надзор поради можност да си го одзеде животот, што може да трае подолг временски период, во зависност од неговата ментална состојба“, наведува изворот.

Според истите информации, Ник се проверува на секои 15 минути со цел да се осигури неговата безбедност, иако досега не се обидел да си наштети.

Претходно добивал лекување

Потсетуваме, Ник Рајнер е обвинет за убиство на своите родители, при што обвинението вклучува повеќекратно убиство под посебни околности. Доколку биде осуден, би можел да се соочи со доживотна затворска казна. На краткото рочиште одржано во средата, тој не се изјаснил како виновен.

Режисерот Роб Рајнер и неговата сопруга пронајдени мртви, полицијата истражува двојно убиство

Според „Пипл“, Роб Рајнер и неговата сопруга биле убиени од нивниот син Ник – полицијата вели: „Истрагата е во тек“