Денеска на 67-годишна возраст почина Кирил Тодороски-Темпо, познат стопанственик и еден од сопствениците на компанијата „Ројтем“ од Прилеп, позната под брендот „Елит кафе“.

„Кирил зад себе остава силен печат, како човек со препознатлив позитивен дух, голема посветеност и љубов кон својата работа. Со години беше двигател во развојот на компанијата, присутен во секојдневието на вработените, клиентите и партнерите. Неговата насмевка, поддршка и искрена човечност ќе недостасуваат на сите што имаа чест да го познаваат. На семејството, пријателите и сите блиски им изразуваме искрено и длабоко сочувство“, соопшти компанијата во објава на социјалните мрежи.

Телото ќе биде изложено на Нови градски гробишта во Прилеп на 04.12.2025 (четврток) од 10 до 12 часот, кога ќе се одржи закопот.