Лидерите добро знаат што значи влез во Шенген или во заедничкиот пазар, но прашањето е дали се подготвени да го направат тоа што е потребно, порача еврокомесарката Марта Кос, коментирајќи ја идејата на албанскиот премиер и српскиот претседател, пренесе Газета Експрес.

Таа нагласи дека пристапот до Шенген зоната или до единствениот европски пазар подразбира сериозни и комплексни реформи, практично на исто ниво како и условите за полноправно членство во Европската Унија.

Во авторски текст за германскиот „ФАЗ“, Еди Рама и Александар Вучиќ претходно укажаа на бавното темпо на евроинтеграцијата, наведувајќи внатрешни предизвици, геополитички тензии и институционални пречки. Како решение, тие предложија нивните земји да добијат пристап до заедничкиот пазар и Шенген, без да имаат политички права и право на вето како полноправни членки.

Вучиќ и Рама со нов предлог до Брисел: Не инсистираме на членство во ЕУ, туку на влез во единствениот европски пазар и Шенген зоната

Кос, сепак, го отфрли ваквиот пристап. На самитот „Конкурентна Европа“ во организација на „Политико“, таа оцени и дека амбициите на Украина да стане членка на ЕУ до 2027 година се нереални, додека Исланд, според неа, би можел да биде исклучок и побрзо да напредува доколку повторно ги отвори преговорите.

Еврокомесарката потенцираше дека Унијата мора да го реформира пристапот кон проширувањето и ги повика земјите членки да излезат со конкретни предлози, особено откако претходните идеи на Европската комисија не добија поддршка.

Таа потсети дека се разгледуваат три можни насоки – задржување на сегашниот модел, негова измена со цел да се избегне застојот кај кандидатите и т.н. „обратно проширување“.

„Од првичните разговори со земјите членки е јасно дека третата опција не е соодветна… тоа би значело вистинска револуција“, изјави Кос, додавајќи дека ни задржувањето на статус кво не е прифатливо.

Како најреална, таа ја посочи втората опција – постепена интеграција што би го забрзала процесот, но без да се прескокнат клучните реформи што ги бара Унијата.

Невозможно е Украина да стане членка на ЕУ за една година, вели Марта Кос

Еврокомесарката Марта Кос е обвинета дека соработувала со југословенската тајна полиција