Франческо Бањаја ќе стартува од првата стартна позиција на Големата награда на Сан Марино во класата Мото ГП. Италијанскиот ас на доминантен начин дојде до најдобриот резултат во квалификациите, во кои блескаа возачите на „Дукати“.

Бањаја стигна до третиот „пол“ оваа сезона, 10-ти во кариерата, со рекорд на патеката „Мизано“ во Римини – 1:31.065 мин.. Претходниот го држеше Пол Еспаргаро од 2020 година – 1:31.077.

„Црвената армија“ на Дукати во првиот ред ќе ја комплетира второпласираниот Џек Милер, а на третото место, откако падна во последниот круг, остана Фабио Квартараро, водечкиот на светскиот шампионат.

Пред Квартараро, во обидот да го надминат времето на Бањаја, во песокот завршија Марк Маркез и Алеш Еспаргаро.

Во вториот стартен ред во 14 трка оваа сезона ќе има уште два „Дукати“, Хорхе Мартин и Жоан Зарко, а нив ќе ги придружува Пол Еспаргаро.

The stage is set for a thrilling battle tomorrow! ⚔️@PeccoBagnaia grabs pole ahead of @jackmilleraus and @FabioQ20! 🏁#SanMarinoGP 🇸🇲 pic.twitter.com/MF50q4OyC9

— MotoGP™🏁 (@MotoGP) September 18, 2021

Шпанците ќе стартуваат во третиот ред, Марк Маркез, Алеш Еспаргаро и Алекс Ринс, а во четвртиот Маверик Вињалес, Жоан Мир и Енеа Бастијанини.

Моментно кај возачите во генералниот пласман води Квартараро со 214 бодови, пред Бањаја (161), а трет е Мир со 157.