Рубин е револтиран од организаторите бидејќи вчера се појави првиот случај на коронавирус во „меурот“ во Њујорк. Организаторите на УС Опен кој стартува денеска објавија дека Беноа Пер е позитивен на коронавирус со што донесе паника меѓу тенисерите и тенисерките бидејќи францускиот тенисер престојуваше во хотелот во кој се најголем дел од останатите играчи.

– Со нас во хотелот е само персоналот, но проблемот е во тоа што многумина од нив секоја вечер си одат во своите домови, а не престојуваат во него. И наредниот ден можат да ни го донесат вирусот. Идентичен е и случајот со луѓето кои не носат со автобусите до терените. Која е поентата да спиеме во изолирани хотели доколку сите не се изолирани. Неверојатно – изјави Рубин.

Организаторите го убедувале Рубин дека луѓето кои немаат допир со играчите, а кои се дел од организацијата носат маски надвор од „меурот“.

Паника пред стартот на УС Опен, француски тенисер позитивен на коронавирус

Сепак, Рубин не е задоволен бидејќи Пер е веќе заразен, а дури 11 луѓе меѓу кои и четворица француски тенисери Ришар Гаске, Адријан Манарино, Грегоар Барер и Едуар Роже-Васлан биле во контакт со заразениот сонародник. Сепак, тие нема да заминат во карантин, но ќе мора да бидат негативни на тестовите пред да им биде дозволено да ги напуштат собите.

– Тениската федерација на САД изјави дека е подготвена за првите позитивни случаи на коронавирус. Но, јас не мислам дека ја зборуваат вистината. Тие што беа во контакт со Пер мораа да потпишат нов протокол според кој нема да имаат пристап на некои места, но сепак ќе имаат право да настапат на УС Опен. Ова е апсурдна ситуација, мислам дека само поради тоа што во тие 11 лица нема некој врвен тенисер, УС Опен не е откажан – додава Рубин.