Македонските одбојкари во Беверен го запишаа првиот триумф во Европската златна лига
Во саботата најдобрата македонска одбојкарска репрезентација на турнирот во Беверен, Белгија, триумфираше со 3:0 во сетови против Азербејџан во рамките од Европската златна лига.
По двата стартни порази во Струмица од Естонија и Чешка, избраниците на селекторот Хари Наковски го запишаа првиот триумф во натпреварувањето.
Нашите најдобри одбојкари доминираа во сите три сета, освојувајќи ги првите два со ист резултат 25:17, а третиот со 25:18.
За нашата селекција најефикасни со по 15 поени беа Филип Савовски и Никола Ѓоргиев, а на спротивната страна Андреј Мелников имаше 13 поени.
Вториот меч Македонија во Беверен ќе го има в недела од 15.00 часот против домаќинот Белгија.
– До денешната победа дојдовме малку неочекувано лесно, сепак ние бевме малку претпазливи, се подготвувавме малку повеќе за овој натпревар. За нас беше тежок периодот да мораме да го победиме Азербејџан и да покажеме дека имаме поголем квалитет. Се надевам дека со иста ваква игра ќе одговориме и во квалификациите за ЕП – изјави селекторот по мечот.