Конан О’Брајан ќе биде домаќин на 99-тото доделување на наградите Оскар, кое ќе се одржи на 14 март 2027 година, во театарот „Долби“ во Лос Анџелес, објавија претставници на Академијата за филмски уметности и науки, пренесуваат странските медиуми.

Со ова, О’Брајан ќе биде домаќин на доделувањето на најважната филмска награда третпат по ред, откако доби позитивни реакции од публиката и критичарите на последните две церемонии.

Нему му се придружуваат извршните продуценти Раџ Капур и Кејти Мулан, кои повторно ќе ја водат продукцијата на церемонијата.

Раководителите на Академијата, Бил Крамер и Линет Хауел Тејлор, рекоа дека ова е исклучителен тим кој подготвувал импресивни, забавни и емотивни програми во претходните две години и додадоа дека со нетрпение очекуваат „Конан маестрално да ја води прославата со својата брилијантност и хумор“.

Доделувањето на наградите бележи раст на гледаноста во последните години, вклучувајќи 19,7 милиони гледачи во првата година на О’Брајан како водител, кога „Анора“ доминираше на доделувањето. Сепак, оваа година се забележа пад на вкупната гледаност кога „Една битка по друга“ ја освои наградата за најдобар филм, иако ангажманот на публиката на социјалните медиуми за време на емитувањето се зголеми за повеќе од 42 проценти.

Претседателот на „Дизни телевижн“, Крег Ервич, рече дека О’Брајан донел нова енергија на Оскарите и рече дека неговиот препознатлив комичен израз ја направил ноќта една од најзабавните прослави во годината.

Церемонијата во 2027 година ќе се емитува во живо на Еј-би-си и ќе биде претпоследна што ќе се одржи во Холивуд и на класичната телевизија, бидејќи во 2029 година ќе се пресели на Јутјуб и во центарот на Лос Анџелес.