Роми Рајнер, ќерка на Роб и Мишел Рајнер, наводно со години живеела во страв од својот постар брат Ник Рајнер. Ник беше уапсен откако неговите родители беа пронајдени мртви на 14 декември во нивниот дом во Лос Анџелес, а против него се поднесени две обвиненија за убиство од прв степен.

„Се чини дека Роми се плашела од Ник уште од детството. Дури и пред неговите проблеми со зависности, неговите испади биле многу вознемирувачки, бидејќи доаѓале ненадејно. Се трудела да го избегнува колку што можела, но тоа не било лесно“, изјавил извор за „Дејли мејл“.

Според истиот извор, Роми сметала дека не е добра идеја Ник да живее во гостинската куќа на нивните родители, па дури ѝ пречело и тоа што живеел преку улица од неа, бидејќи таа живеела во близина на семејниот дом.

„Сепак, таа знаела дека родителите го примиле за да можат подобро да внимаваат на него и да му обезбедат покрив над главата. Имало многу ситуации во кои Роми била лута на Ник, а тоа дополнително ја зближило со нивниот најстар брат Џејк“, навел изворот.

Тој додал дека Џејк ги делел истите чувства, па Роми можела со него да разговара за Ник кога не сакала дополнително да ги оптоварува родителите.

И покрај стравот, Роми секогаш се обидувала да му помогне на братот и често го нарекувала свој „најдобар пријател“.

„Секогаш кога родителите изгледале исцрпено или барале помош, Роми и Џејк биле тука за Ник. Односите не биле совршени, но таа никогаш не се откажала од него“, изјавил изворот.

По трагедијата, Џејк и Роми дадоа изјава за „Пипл“, во која своите родители ги опишаа како „најдобри пријатели“.

„Зборовите не можат ни приближно да ја опишат незамисливата болка што ја чувствуваме секој ден. Загубата на нашите родители, Роб Рајнер и Мишел Рајнер, е нешто што никој не би требало да го доживее. Тие не беа само наши родители, туку и наши најдобри пријатели“, наведоа тие.

Тие се заблагодарија за поддршката и сочувството што го добиле од луѓе од целиот свет и побараа приватност, истакнувајќи дека сакаат нивните родители да бидат запаметени по животите што ги живееле и љубовта што ја давале.

Според претходни информации, по апсењето Ник бил ставен под посебен надзор во затвор, поради загриженост за неговата безбедност. Тој се наоѓа во притворскиот центар „Твин Тауерс“ во Лос Анџелес и е под редовна контрола од затворскиот персонал. На 17 декември првпат се појавил пред суд, каде што не се изјаснил за вина. Следното рочиште е закажано за 7 јануари 2026 година.

Децата на Роб Рајнер се огласија со изјава откако нивниот брат беше обвинет за убиство на родителите

Режисерот Роб Рајнер и неговата сопруга пронајдени мртви, полицијата истражува двојно убиство