Кинескиот производител на спортска облека „Анта спортс“ размислува за понуда за преземање на „Пума“, при што акциите на германската компанија скокнаа за 14 проценти поради веста. Според анонимни извори, „Анта спортс“ работи со советник за да ја процени понудата за „Пума“ и би можел да се здружи со приватен инвестициски фонд доколку одлучи да продолжи понатаму, објави „Блумберг“.

И други кандидати би можеле да покажат интерес за „Пума“, како што се кинескиот „Ли-нинг“, кој веќе е во преговори со банките за потенцијално финансирање на трансакцијата, како и јапонскиот „Асикс“, додаваат изворите. „Анта спортс“, која ги поседува брендовите „Фила“ и „Џек Волфскин“, забележа раст на акциите за 10 проценти оваа година, а нејзината пазарна вредност се проценува на околу 31 милијарда долари.

Германскиот производител на спортска облека „Пума“, пак, има слаби резултати, а новиот извршен директор Андреас Хуберт, кој ја презеде функцијата во јули, се обидува да ја реструктуира компанијата за да се врати на раст на профитот. Целта на „Пума“ е да се врати на раст до 2027 година и да се етаблира како еден од трите најголеми спортски брендови во светот.