Србија: Камионите ќе стојат сè до исполнување на барањата
Српскиот претседател Александар Вучиќ вчера изјави дека е подготвен да разговара со превозниците кои ги блокираат товарните терминали на граничните премини и додаде дека државата е подготвена да ги слушне нивните барања. Одговарајќи на новинарско прашање во Велика Дренова во врска со протестот на превозниците, тој рече дека секој пат барал од ЕУ барањата на превозниците да бидат земени предвид.
Препорачано
– Луѓето се борат за своите права. Не знам како да помогнам, секој пат барав од ЕУ да ги земат предвид нивните барања. Ако можеме да направиме нешто и да помогнеме, подготвен сум да разговарам и да ги слушнам нивните молби – рече Вучиќ.
Транспортерите од земјите од Западен Балкан, вклучувајќи ја и Србија, во понеделник напладне почнаа да го блокираат патниот транспорт на товарните премини со земјите од Шенген-зоната поради несоодветниот одговор на Европската комисија во врска со третманот, а исто така и ограничувањето на престојот поради дневните работни обврски. Вчера реагираше и премиерот на Србија, проф. д-р Ѓуро Мацут, кој изјави дека возачите на камиони блокирале повеќе од 20 товарни премини, што апсолутно е предизвикано од недоразбирањето и нефлексибилноста на администрацијата во Брисел, но дека се надева дека наскоро ќе се најде решение за транспортерите од Србија и регионот. Тој не можеше прецизно да каже кога проблемот ќе биде решен, наведувајќи дека разговарал со амбасадорот на ЕУ во Србија (Андреас фон Бекерат) и дека побарал итен состанок следната недела.
– Се надеваме дека ќе има некаков вид ослободување или барем привремено решение за овие луѓе да го добијат тоа, не мислам дека ќе има ригидно броење на деновите. Дадовме многу добри идеи, како што е броење часови наместо броење денови на престој. Знаете, кога влегувате на полноќ и една минута или минута пред полноќ, ви се смета денот кога сте влегле и веднаш следниот ден 24 часа, иако сте биле таму две минути – објасни Мацут- пренесе Политика.
