Ѓоковиќ планира да игра во Мелбурн: Сè уште чекам дали ќе ми биде укината забраната
Цела планета ја потресе веста дека на Новак Ѓоковиќ не му беше дозволен влез во Австралија на почетокот на 2022 година, кога Србинот сакаше да атакува на нова титула на грен слем турнирот „Австралија опен“ во Мелбурн.
Од тој момент почна да важи забраната за влез во Австралија, која првично трае три години, но Ѓоковиќ се надева дека ќе биде укината.
– Сè уште чекам вести дали ќе ми биде укината забраната, мислам дека имам тригодишна забрана за патување, поради околностите видени на почетокот на годинава. Откако тоа ќе се отстрани, треба да аплицирам за виза. Сакам да одам и сакам да играм таму – рече Ѓоковиќ.
Токму за тоа на еден собир зборуваше и директорот на „Австралија опен“, Крег Тајли.
– На добар пат сме да се вратат сите врвни играчи. Сега сме во поинаква ситуација од пред девет месеци, мислам дека е сосема поинаква средина со луѓе кои слободно патуваат низ светот и се надевам дека ќе ги имаме сите најдобри играчи овде во јануари – рече Тајли, збунувајќи ги сите, со оглед на тоа што не е јасно дали мислел на Новак, кого „исклучително го цени“.
Барем така изјави претходно кога кажа дека Ѓоковиќ ќе може да игра во наредните години.
– Да, ќе може да игра. Секако, прво треба да ја помине оваа година, но тој ќе одлучи дали ќе игра. На крајот на краиштата, тој е тенисер број еден во светот и многу му се допаѓа Австралија Опен – беа зборовите на Тајли пред девет месеци.