Македонскиот рапер и продуцент Марко Маринковиќ – Слаткар го доби Сребреното Јутјуб плеј копче, признание што платформата Јутјуб го доделува на креаторите кои ќе ја надминат бројката од 100.000 претплатници на својот официјален канал.

Слаткар веста ја сподели на својот инстаграм-профил, каде објави фотографија со плакетата и упати благодарност до својата публика.

„Првпат добивам плакета што ми ја дале 100.000 луѓе.

100.000 луѓе што одлучиле да ме поддржат и да се претплатат.

Фала ви 100.000 пати.

Ова е само почеток, одеме до 1.000.000“, напиша тој.

Сребреното плеј копче претставува официјално признание од Јутјуб за стабилна и лојална база на следбеници. Со оваа награда, Слаткар уште еднаш покажа дека е еден од највлијателните домашни артисти на дигиталните платформи.

Неговиот канал со години бележи милионски прегледи, особено со песните „Дими џам“ (речиси 7 милиони), „Бетмен“ (6 милиони), „Океани“ (4 милиони) и други хитови што имаат широка публика и надвор од Македонија.