На годинешните оскари, Ема Стоун на црвениот тепих позираше во светкава сребрена креација со кратки ракави, која изгледаше како да е направена од течно сребро. За изработката на фустанот биле потребни дури 600 часа работа.

Актерката е позната по тоа што често на црвениот тепих носи креации од француската модна куќа „Луј Витон“, па така беше и оваа година на церемонијата одржана во „Долби театар“ во Лос Анџелес.

Двојната оскаровка, која оваа година беше номинирана за најдобра главна актерка за филмот „Бугонија“ на режисерот Јоргос Лантимос, носеше долга и елегантна вечерна тоалета што суптилно ја истакна нејзината фигура.

Фустанот е шиен по мерка, со длабоко отворен грб и украсен со многу ситни перли. Самото рачно шиење на перлите и финализирањето на креацијата траело околу 600 часа.

Кројот ја следи линијата на телото и благо се шири кон долу, оставајќи впечаток на минималистичка елеганција и софистицираност.

Стајлингот го надополни со дијамантски накит – обетки и прстени од италијанската куќа „Репоси“, кои совршено се вклопија со сребрениот фустан.