ФОТО | Новогодишен колач кој ќе ви го замириса домот на љубов
Новогодишните празници следат периодов, а ние сакаме да им угодиме на сите сетила, најчесто со нешто слатко, нешто меко и воздушесто како домашен колач.
Ние ви предложуваме нешто убаво, брзо и едноставно што ќе ви ја наполни душата и ќе ви го замириса домот на љубов.
Потребни состојки:
- 4 јајца
- 200 гр кафен шеќер
- 1 ванилин шеќер
- рендана кора од 3 портокали
- 100 мл цеден сок од портокал
- 100 мл јогурт
- 150 гр стопен путер
- 350 гр брашно
- 1 прашок за печиво
- цимет, морско оревче, прстофат сол
- 100 гр сечкани лешници/бадеми/ореви
Подготовка:
Се матат со миксер јајцата со шеќерот, ванилата, ренданата кора од портокал, се додава цедениот сок од портокал додека да стане пенасто. Се додава јогуртот, путерот и се мати уште неколку минути.
Настрана се просејува брашното, се додава прашокот за пециво, рамно лажиче цимет, рендано морско оревче и прстофат сол. Се додава постепено во мократа смеса и се меша со спатула. На крајот се додаваат сечканите јаткасти плодови и се промешува добро.
Во калап за куглоф се премачкува масло од сите страни, а најмногу околу централниот дел (таму се лепи смесата најмногу). Се истура половина од смесата. Во останатата половина се додава лажица какао и се меша. Се истура кафената смеса врз белата половина и со чепкалка за заби се шарка, за да се измешаат двете бои.
Се пече прво половина час на 170 степени, а потоа уште 20 минути на 200. Со чепкалка проверете при крај дали е куглоф колачот печен. Се чека добро да се олади, па со помош на ноже се одделува од калапот и се превртува на чинија. Можете да го прелиете со стопена чоколада или да го наросите со шеќер во прав.