Поранешната поп-ѕвезда Бритни Спирс искрено проговори на Инстаграм за затегнатите односи со семејството и чувството на осаменост. Пејачката сподели емотивна објава во која истакна дека е „неверојатно среќна што е жива“, и покрај начинот на кој, како што вели, била третирана од членовите на семејството.

„Ние како луѓе сакаме да се чувствуваме поврзани и никогаш не сакаме да бидеме сами. За оние во семејството кои мислеа дека помагаат така што ќе ве изолираат и ќе направат да се чувствувате целосно отфрлено, згрешија. Можеме да простиме, но никогаш не се заборава. Копнежот и желбата за контакт секогаш се важни!“, напиша Спирс.

Пејачката призна дека и понатаму чувствува страв од членовите на семејството, и покрај благодарноста што е жива.

„Неверојатно сум среќна што воопшто сум жива, со оглед на тоа како моето семејство се однесуваше кон мене во еден период од животот, а сега дури и се плашам од нив. Чудно е како Бог делува на мистериозни начини. Пријатели, што мислите, што ни порачува денес? Зашто, искрено, без разлика што ќе кажат, тие никогаш нема да преземат одговорност за тоа што го направија“, напиша таа.

Во продолжение на објавата, Бритни сподели и секојдневни детали, откри дека јадела чизкејк со соседот и дека веќе еден месец не танцува поради двојна повреда на прстот на ногата.

Оваа објава доаѓа по години отворени признанија на Спирс за нејзините комплицирани односи со семејството, вклучувајќи го таткото Џејми (73), мајката Лин (70) и сестрата Џејми Лин (34). За време на минатогодишните празници, пејачката на Инстаграм објави фотографија од новогодишна елка со саркастичен коментар за семејните празнични планови.

Бритни Спирс зборуваше за семејните односи и во својата книга од 2023 година, „The Woman in Me“, каде што изрази жалење за сестра ѝ Џејми Лин поради животот во нејзината сенка и разводот на родителите.

Со години таа јавно зборуваше и за судски наложеното старателство под кое беше ставена во 2008 година, а со кое управуваа нејзиниот татко и адвокат. Во јуни 2021 година Бритни првпат јавно го оспори старателството, откривајќи колку тоа ѝ го нарушило приватниот и емотивниот живот. Џејми Спирс беше тргнат од улогата старател во септември 2021, а целото старателство беше укинато во ноември истата година.

Подоцна, таткото и ќерката го решија и правниот спор околу адвокатските трошоци во април 2024 година.