Најновите извештаи покажуваат дека имплантите во градите може да предизвикаат ретки видови на рак.

Силиконите денес се „распространети“ низ целиот свет. Секоја втора девојка/жена ги има, станаа најнормален естетски зафат, иако порано претставуваа табу тема. Сепак, собрани се многу извештаи ширум светот, кои носат информации за штетното влијание на силиконските импланти врз здравјето на луѓето.

Американската агенција за храна и лекови (ФДА) објави јавно предупредување дека ретки видови на рак се поврзани со операциите на имплантации на дојките. Во нејзиниот извештај се наведува дека се работи за карцином на лушпести (плочести) клетки на епителот, кој е утврден во ткивото што се формира околу имплантот во градите.

Иако појавата на овој рак е ретка, здравствените работници и луѓето кои сакаат да се подложат на оваа операција, треба да бидат свесни за ризиците, како и задолжително да ги пријават сите случаи на рак кои се појавуваат околу имплантот.

Исто така, се напоменува дека луѓето со импланти во градите не мора да ја менуваат својата рутинска медицинска нега или да брзаат да ги отстранат поради ова откритие, но тие би требало да бидат свесни за некои од пријавените знаци и симптоми, кои вклучуваат оток, болка, грутки или промени на кожата.

ФДА ажурирала неколку прописи за имплантација на гради, вклучително и новото означување со предупредување на кутијата и контролната листа на пациентите која ги информира заинтересираните дека имплантите не се медицинско помагало кое ќе трае доживотно. Од лекарите сега, исто така, се бара да ги спроведат пациентите низ сите потенцијални здравствени проблеми што произлегуваат од операциите на имплантација на дојките.