Европскиот центар за слобода на печатот и медиумите издаде две предупредувања за вербални напади од српскиот претседател Александар Вучиќ и претседателката на Собранието Ана Брнабиќ врз телевизиите Н1 и Нова, пренесуваат српските медиуми.

Во предупредувањето за Вучиќ, се наведува дека тој вербално ги нападнал Н1 и Нова за време на јавно обраќање.

„На 24 февруари, Вучиќ ги дискредитираше независните медиуми Н1 и Нова за време на јавно обраќање. Тој ја критикуваше Н1 за нејзиното известување за апсењето на воени ветерани, осомничени за заговор за соборување на владата и напад врз Вучиќ. Извештајот на Н1, исто така, вклучуваше изјави од Министерството за внатрешни работи и одбрана на притворените лица. За време на јавното обраќање, Вучиќ рече: „Требаше да го претепаат моето дете до смрт и да го заколат… Ова се лаги кои можеа да се прочитаат некаде. И каде – можете да претпоставите.“ Претседателот продолжи да упатува постојани обвинувања врз Н1 и Нова за „ширење лаги“, додавајќи дека досега имал „1.000 причини“ да ги затвори, но не сакал“, се вели во предупредувањето.

Се додава дека во меѓувреме, претседателката на српскиот парламент, Ана Брнабиќ, ја дискредитирала Н1 на социјалната мрежа X, главно обвинувајќи дека се „срам за новинарската професија“ и „пропагандисти за кои вистината е неважна“.

На 25 февруари, Независното здружение на новинари на Србија (НУНС) ги повика Ана Брнабиќ и Александар Вучиќ „веднаш да престанат да ги таргетираат медиумите и новинарите и да се воздржат од изјави што предизвикуваат омраза и ја загрозуваат безбедноста на новинарите на Н1“.

Се нагласува дека овие напади не се изолирани.

-Новинарите на Н1 се особено цел на претседателот и јавните службеници, кои редовно ги именуваат во јавни изјави, прикажувајќи ги како „непријатели на државата“. Во стилот на Шарли Ебдо“ – вели Европскиот центар за слобода на печатот.

Во предупредувањето се додава дека НУНС во соопштението ја осуди и пораката на Вучиќ во која се сугерира затворање на телевизиските станици.

Организација блиска до Вучиќ објави „листа за отстрел“ со имиња на 40 српски независни новинари – Слободен печат

Изјавата на Вучиќ доаѓа по објавувањето на отпуштањето, неколку дена претходно, на Александра Суботиќ, извршна директорка на „Јунајтед Медиа“ (која управува со Н1 и Нова). Нејзиното отпуштање дојде неколку месеци откако Организацијата за известување за организиран криминал и корупција (OCCRP) објави аудиоснимка во која наводно се зборува за планот на Вучиќ да ја отстрани Суботиќ, со цел да влијае врз уредувачката независност на Н1, според Европскиот центар за слобода на печатот и медиумите, кој на онлајн платформата „Мапирање на слободата на медиумите“ ги евидентира сите прекршувања на слободата на медиумите низ цела ЕУ и земјите кандидати за членство.

Вучиќ нарече новинари „имбецили“, се извинуваше, па пак ги нападна: „Ја оцрнуваат професијата“