Еурофарм Пелистер без тренерот Бабиќ против Магдебург
РК Еурофарм Пелистер денеска ја известува јавноста дека при последното тестирање на ковид-19, неопходно за патувањето на екипата во Магдебург, тренерот на екипата Жељко Бабиќ е позитивен на ПЦР тестот.
Се работи за асимптоматски случај и Бабиќ веќе е во карантин. Наместо него екипата во Магдебург ќе ја водат неговите помошници Божидар Мојсов и Ице Соколески.
Реванш осминафиналниот меч во ЕХФ Европската лига ќе се игра во вторник (30 март) со почеток од 18.45 часот, а потсетување дека на првиот дуел во салата „Боро Чурлевски“ триумфираше германската екипа со 24:32 и е поблиску до пласман во следната фаза.
Исто така хрватскиот стратег на битолската екипа ќе ги пропушти и натпреварите против Младост Богданци (Куп на Македонија) и Татран Прешов (СЕХА лига).
Клубот му посакува на Бабиќ брзо оздравување и враќање на работното место. Исто така известени се претставниците на Вардар 1961, со кои Еурофарм Пелистер играше натпреварот од плеј-офот на Суперлигата во саботата.