Земјите од Персискиот Залив претрпеа економска штета од повеќе од 50 милијарди долари поради затворањето на Ормускиот теснец, додека тензиите на Блискиот Исток ескалираат од почетокот на американско-израелскиот напад врз Иран на 28 февруари, а морскиот теснец останува затворен, според анализата на Истражувачкиот центар за енергетски стратегии и политики на Турција (TESPAM). Затворањето на Ормускиот Теснец, кој опслужува 20 проценти од глобалниот транспорт на нафта и служи како главна порта за трговија со течен природен гас (LNG), го зголеми финансискиот притисок врз економиите на земјите од Заливот, а извозот на нафта се намали за 36 проценти, истакнува агенцијата Анадолија според податоците од анализата.

Помеѓу 27 февруари и 30 март, извозот на нафта од Иран, Ирак, Кувајт, Саудиска Арабија, ОАЕ и Бахреин падна од 12,3 милиони барели дневно на 7,8 милиони барели, што е намалување од 36,4 проценти. Конфликтот, предизвикан од нападите на САД и Израел врз Иран, проследени со одмазднички мерки на Техеран, влезе во својот втор месец и се прелеа во поширока регионална криза. Во извештај објавен од Истражувачкиот центар за енергетски стратегии и политики на Турција (TESPAM) со седиште во Анкара, Анадолија истакнува дека намалениот извоз резултирал со загуба од 15,27 милијарди долари приходи од нафта.

Поради Ормускиот Теснец се прекинуваат летови: Скандинавска компанија прва реагира

Ако се вклучат прекините во испораките, пратките, електраните и другите сектори на течен природен гас (LNG), вкупните загуби надминуваат 50 милијарди долари. Намалениот сообраќај низ теснецот значително го намали обемот на извозот, намалувајќи ги примарните извори на приход за економиите на Заливот. Покрај енергетските пазари, конфликтот ја забави економската активност во целиот регион, влијаејќи на производството, инфраструктурата, логистиката, трговските патишта, финансиите и туризмот, според анализата на TESPAM, потсетувајќи дека земјите од регионот на Заливот произведуваат околу 30 милиони барели нафта дневно, што претставува речиси една третина од глобалната понуда.

Бројките од Меѓународната агенција за енергетика (ИЕА) со седиште во Париз покажуваат дека околу 25 проценти од глобалните поморски испораки на нафта минуваат низ Ормускиот Теснец, а големите азиски економии, вклучувајќи ги Кина, Јапонија, Јужна Кореја и Индија, се во голема мера зависни од снабдувањето со енергија од Заливот, при што 44 проценти од суровата нафта што се испорачува од регионот се извезува во Кина и Индија.

Наведувајќи дека ова е најсериозното нарушување на снабдувањето во модерната историја, претседателот на Истражувачкиот центар TESPAM, Огужан Акјенер, рече дека земјите преземаат мерки за намалување на последиците од нарушувањето. Тој предупреди дека продолжениот конфликт може да ги продлабочи предизвиците во енергетскиот, транспортниот и прехранбениот сектор.

Акјенер истакна дека кризата ја преобликува глобалната енергетска динамика и дека најголеми губитници се извозниците од Заливот, азиските увозници на нафта и течен природен гас (LPG), транспортот со танкери и земјите зависни од трговијата преку Ормускиот Теснец – објави Н1.