Обединетите Арапски Емирати и Кувајт почнаа да го намалуваат производството на нафта, бидејќи речиси целосната блокада на клучниот Ормуски теснец се прелева на енергетските пазари и влијае на глобалното снабдување, објавува Блумберг Адриа.

Националната нафтена компанија „Абу Даби“ „управува со нивоата на производство на отворено море за да одговори на потребите за складирање“, се вели во соопштението на компанијата, без дополнителни детали. „Кувајт Петролеум Корп“ објави дека го намалува производството и на нафтените полиња и во рафинериите по „иранските закани за безбедното поминување на бродовите низ Ормутскиот теснец“.

Војната на Блискиот Исток речиси го затвори Ормускиот теснец – тесниот морски премин што го поврзува Персискиот Залив со отвореното море – за поморскиот сообраќај по иранските закани за превозот. Тоа ги блокираше извозните текови од водечкиот регион за производство на нафта во светот, помагајќи им на цените во Лондон да го достигнат највисокото ниво на затворање за повеќе од две години, од речиси 93 долари за барел. Како резултат на тоа, потрошувачите бараат алтернативи, додека постои и опасност светската инфлација дополнително да се зголеми.

Намалувањето на производството во Кувајт започна на околу 100.000 барели дневно рано во саботата и се очекува речиси тројно да се намали денеска, со понатамошни постепени намалувања во зависност од нивоата на складирање и условите во Ормускиот теснец, изјави извор директно запознаен со планот, кој побара да остане анонимен.

Обединетите Арапски Емирати и Кувајт, како и другите земји од Персискиот Залив, се чести цели на ирански ракети и беспилотни летала во војната што се шири низ регионот. Американската амбасада во Кувајт беше погодена, а цел беше и американскиот конзулат во Дубаи, заедно со друга инфраструктура во тие две земји.

Иран го затвори Ормускиот Теснец, каде што поминува петтина од светската нафта