Џони Деп сведочеше против поранешната сопруга: Мојата цел е вистината
Холивудскиот актер Џони Деп во вторникот се обрати пред судот во Вирџинија за случајот во кој ја обвинува неговата поранешна сопруга Амбер Херд за клевета, која претходно го обвини актерот за семејно злоставување, пренесуваат странските медиуми.
Во своето тричасовно сведочење, кое ќе продолжи и денес, ѕвездата зборуваше за нејзините обвинувања и нејзината историја на злоупотреба на дрога.
„Мојата цел е вистината“, рече Деп на почетокот на своето сведочење.
Тој ја тужи својата поранешна сопруга и бара 50 милиони долари поради написот објавен во „Вашингтон пост“ во 2018 година во кој таа прозборе за семејното злоставување. Деп не беше спомнат по име во ова дело, но претходните настани укажаа за кој станува збор.
Деп тврди дека текстот на Херд му нанел финансиски загуби, вклучително и откажување на идни проекти како продолженијата на „Пиратите од Карибите“ по цели 15 години.
„Еден ден си Пепелашка така да се каже, а потоа за нула и шест секунди си Квазимодо“, рече Деп за тоа како се свртела неговата кариера откако беше обвинет за злоставување. „Јас не го заслужив тоа, ниту моите деца, ниту луѓето кои веруваа во мене сите овие години“, рече Деп.
Во своето сведочење Деп призна дека тој и Херд се расправале за време на врската.
„Никогаш не стигнав до точка да ја удрам госпоѓа Херд на кој било начин, ниту пак сум удрил некоја жена во својот живот“, истакна тој.
Актерот исто така го опиша турбулентниот однос на неговите родители и вербалното и физичкото малтретирање што тој и неговите браќа и сестри го доживеале од нивната мајка. Тој изјави дека неговото прво искуство со земање контролирани супстанци се случило кога имал приближно 11 години и дека ги земал таблетите на мајка му со рецепт „за да избега од хаотичната природа на она што тие го живееле“.
Судењето започна минатата недела, а ова беше прва можност за Деп да проговори за случајот пред судот и јавноста.
Повеќе написи на темата:
Пријател на Деп се расплака на суд: Многу луѓе се погодени од оваа злонамерна лага