Фотоизложба посветена на 45-годишнината на ИФФК „Браќа Манаки“ на 31 октомври, во 19 часот, ќе биде отворена во Кристалната сала на КИЦ Офицерски дом во Битола. Автор на фотографиите е Сашо Ставрев, кој редовно го следи филмскиот фестивал со години наназад.

Изложбата на Сашо Ставрев содржи повеќе стотици фотографии, кои ќе бидат прикажани на 28 паноа. Фестивалската палата низ годините, статуетките на фестивалот, лауреати и разни филмски работници од целиот свет, филмаџии и филмски ѕвезди, филмски режисери и Оскаровци биле во фокусот на објективот на Ставрев.

Изложбата ќе долови и моменти на заедничко дружење, необични моменти, повторно доаѓање низ годините, генерации на филмаџии „татко и син“, селфи фотографии, амбиент, автограми, мастер класови и многу информации за добитниците на наградите за животно дело, како и наградите „Камера 300“.

– „Една за мене, една за историјата“. Тоа беа зборовите на Милтон Манаки. Доказ дека Битола не случајно е град со посебна творечка енергија, харизматични луѓе и случувања е фотоизложбата на Сашо Ставрев – истакнуваат од КИЦ Битола – Офицерски дом.