Зоран Терзиќ по 20 години повеќе не е селектор на Србија
Зоран Терзиќ, повеќе не е селектор на женската одбојкарска репрезентација на Србија. На најтрофејниот српски одбојкарски тренер му истече договорот со Одбојкатската федерација на Србија, по што и двете страни се договорија да не се продолжува соработката.
– Разговорот со него го имавме два дена по завршување на Европското првенство и тоа по негово барање. Ние сме тука за да му излеземе во пресрет. Јасно беше дека по 20 години работа во една екипа, тренерот бара нова мотивација и предизвици. Ние можеме да му кажеме едно големо благодарам и да му поклониме за се што направи. Му посакуваме се најдобро во новите предизвици – изјави Зоран Гајиќ, претседател на Одбојкарската федерација на Србија.
Терзиќ на селекторската позиција во женската репрезентација на Србија седна во мај 2002 година и освои 20 медали на најголемите натпреварувања.
Терзиќ со Србија на Олимписките игри освои сребрен медал во Рио де Жанеиро (2016) и бронзен во Токио (2021). На Светските првенства има златен медал од 2018 година и бронзен од 2006 година.Во 2015 година го освои сребрениот медал на Светскиот куп, а има три бронзи од Гран При турнирите, а најголемите успеси ги оствари на Европските првенства. Терзиќ со српските одбојкарки има три злата од ЕП (2011,2017,2019), две сребра (2007 и 2021) и една броза (2015). Зоран Терзиќ два пати беше прогласен за најдобар тренер во Европа во изборот на Европската одбојкарска федерација.