Во „Матица македонска“ промоција на книгата „Просто и строго – Конески“ од Иван Антоновски
Со утрешната промоција се одбележува 30-годишнината од физичкото заминување на великанот Блаже Конески и се прави обид за ново исчитување на неговото книжевно дело.
Во книжарницата на „Матица македонска“ во центарот на Скопје утре (среда) во 18 часот ќе биде промовирана книгата „Просто и строго – Конески“ од Иван Антоновски со што книгоиздавателството „Матица македонска“ ќе ја одбележи 30-годишнината од физичкото заминување на Блаже Конески. Промотори на книгата, која претставува ново исчитување на книжевното дело на великанот Конески, ќе бидат универзитетските професори Венко Андоновски и Димитар Пандев, а e предвидена и музичка програма на Драган Даутовски.
Во „Просто и строго – Конески“ на Антоновски се отвораат прашања и се изнесуваат согледби и заклучоци и за некои помалку анализирани, афирмирани и вреднувани, а важни сегменти од опусот на Конески. Според оцените на промоторот Пандев, во оваа книга Антоновски прецизно и тестаментално го чита Конески, така како што се чита послание срочено од престижна јазикотворечка личност.
„Тој ја доловува смислата на Конески, на која самиот толку инсистираше и не дозволуваше прашања. Но, долг и право е на авторот следбеник на тие загатнати прашања да посочи одговор. Во името на егзактноста со која понира во пределните области на Конески“, нагласува Пандев.
„Матица македонска“ и во минатите години објави неколку книги што се однесуваат на опусот на Блаже Конески. Со оваа промоција со која се одбележува 30-годишнината од неговото физичко заминување, книгоиздавателството продолжува да ја остварува својата определба да го афирмира и да го вреднува делото на великанот.