ВИДЕО | Маск ќе освојува нова област – хуманоидна роботика: Физичката работа ќе биде избор
„Тесла е веројатно најголемата роботска компанија во светот, бидејќи нашите автомобили се получувствителни роботи на тркала. Некако има смисла истото да се стави во хуманоидна форма“, вели претприемачот Илон Маск.
Откако доминираше на пазарот на електрични возила и влезе во вселенската трка, сопственикот на компанијата „Тесла“, Илон Маск, објави нова област што сака да ја освои – хуманоидна роботика.
Претприемачот пред неколку дена изјави дека до следната година ќе го има првиот прототип на андрогиниот „Тесла Бот“.
Врз основа на истата технологија како и кај полуавтономните возила, роботот ќе може да извршува основни задачи насочени кон елиминирање на потребата луѓето да се занимаваат со опасни или досадни работи, истакна Маск на онлајн настанот за напредокот на „Тесла“ во вештачката интелигенција.
„Тесла е веројатно најголемата роботска компанија во светот, бидејќи нашите автомобили се получувствителни роботи на тркала. Некако има смисла да се стави во хуманоидна форма“, рече тој.
Маск вети дека неговиот иден робот ќе биде бениген. Тој рече дека „Тесла бот“, ќе има раце со пет прсти и ќе биде црно-бел, ќе биде „пријателски“ расположен и ќе биде изграден на таков начин што „ќе може да побегнеш од него и најверојатно да го совладаш“.
„Да се надеваме дека тоа нема да се случи, но никогаш не се знае“, се пошегува тој.
Маск, втората најбогата личност во светот според Форбс, на конференцијата рече дека верува дека роботите ќе го преземат физичкиот труд.
„Мислам дека физичката работа ќе биде избор во иднина“, рече тој.
Како извршен директор на „Тесла“, Маск ја трансформираше компанијата од старт ап компанија во компанија која го „диктира“ темпото на индустријата за електрични автомобили. Компанијата во јули објави дека кварталниот профит за првпат надминал милијарда долари.
Компанијата на Маск, „SpaceX“, исто така, се натпреварува на растечкиот пазар на комерцијални простори, додека целта на „Neuralink“ е да развие импланти на мозокот за поврзување на луѓето и компјутерите.