На социјалните мрежи повторно се актуелизираа видеа и фотографии од прославите на 1 Мај во поранешна Југославија, кои разбудија носталгија кај многумина.

На фејсбук-страницата „Носталгија“, која има илјадници следбеници, беше објавено видео од прослава на Меѓународниот празник на трудот, на кое се гледа Јосип Броз Тито како присуствува на настан со детски хор и голем број граѓани, и покрај врнежливото време.

Во обраќањето до работниците, Тито го честитал празникот со порака дека идните генерации треба да живеат подобро и да им се заблагодарат на претходните за создаденото.

Покрај 1 Мај, во тогашната Социјалистичка Федеративна Република Југославија, крајот на месецот традиционално бил резервиран и за одбележување на 25 Мај – Денот на младоста, кој се славел како роденден на Тито.

Во коментарите под објавата, бројни корисници се присетуваат на тој период, истакнувајќи дека прославите биле масовни и исполнети со позитивна атмосфера. Дел од нив наведуваат дека работниците тогаш имале подобри услови и повеќе денови одмор за празникот.