Кога летните горештини ќе го заземат својот замав, асфалтот во градовите станува речиси неподнослив, а термометарот ќе ги надмине критичните степени, спасот треба да се бара на повисоки надморски височини. Дали знаевте дека на секој 100 метри висина, температурата се намалува за околу 1 степен? Тоа значи дека додека во градот е 35 степени целзиусови, на нашите највисоки врвови ве очекува пријатна и освежувачка клима.

За тоа како паметно да побегнете од градскиот пекол и кои дестинации се идеални за ова лето, разговараме со Никола Илиевски – Жика, еден од нашите најдобри скајранери, актуелен репрезентативец во оваа дисциплина и вистински „outdoor“ човек на кој планините му се втор дом.

Во продолжение, Никола ни ги открива топ 5 планините за летно разладување, но и клучните совети како безбедно да уживате во нивните убавини.

1. Кораб – Гостивар / Дебар

Како највисока планина во Македонија со својот врв Голем Кораб (2.764 м), ова е дестинацијата каде што загарантирано ќе го заборавите летниот пекол. Кораб нуди фасцинантна алпска убавина, недопрена природа и извори со ледена вода кои нудат вистинско разладување.

2. Баба (Пелистер) – Битола

Планината Баба со својот највисок врв Пелистер е вистински рај за летните денови. Покрај густата и сенчеста молика која штити од сонцето во пониските делови, на поголема височина ве очекуваат Големото и Малото Езеро (Пелистерски Очи) – идеални локации за бегство од градските горештини.

3. Шар Планина – Тетово

Шар Планина е огромен масив богат со бројни леднички езера, познати како „шарски очи“. Овие езера, како што се Боговинското или Црното Езеро, се совршени точки за одмор и освежување по долгите летни тури. Нејзините непрегледни пасишта и високи врвови нудат неверојатно струење на чист и ладен воздух.

4. Јакупица (Мокра Планина) – Велес / Скопје

Сместена во срцето на Македонија, Јакупица и нејзиниот врв Солунска Глава (2.540 м) се синоним за планинска свежина. Пространото плато и карпестите предели нудат вистинско планинско искуство, а близината на изворите на реката Бабуна дава дополнителен мотив за по сета.

5. Галичица – Охрид / Ресен

Иако е нешто пониска во споредба со претходните, Галичица има уникатна позиција сместена помеѓу двете најголеми езер, Охридското и Преспанското. Оваа позиција овозможува постојано пријатно ветре, а погледот кој се протега кон двете езера истовремено, додека вие уживате во пријатната планинска температура, е незаменлив.

Како паметно и безбедно на планина во лето?

Како искусен планинар Илиевски предупредува дека планината во лето крие и одредени ризици доколку не сме соодветно подготвени. Еве ги неговите клучни препораки:

Внимавајте на УВ-зрачењето

Поради поголемата надморска височина, атмосферата е поретка, па затоа соларното и УВ-зрачењето е многу посилно на планина отколку во градот. Важно е максимално да го заштитите телото од директна изложеност на зраците. Задолжително носете капа со штитник, очила за сонце со добра заштита и лесна, долга облека со УВ-фактор доколку се движите по отворени гребени. Крем за сончање со висок фактор е задолжителен детаљ во ранецот.

Хидратацијата е клуч на успехот

На повисоки температури и при физички напор, телото брзо губи течности преку потењето, а планинскиот воздух дополнително „ве суши“. Никола советува со себе секогаш да носите доволно количество течности. Не се потпирајте само на обична вода, исклучително важно е да внесувате електролити кои ќе ги надоместат изгубените минерали и ќе спречат дехидратација, грчеви во мускулите или исцрпеност.

Планирајте ги турите рано

Наутро избегнувајте го движењето во најтоплиот дел од денот, помеѓу 11 и 16 часот. Започнете ја вашата авантура во раните утрински часови за да ги поминете најтешките нагорнини додека сонцето сè уште не ја достигнало својата полна сила.

Затоа во ранецот секогаш имајте доволно вода и електролити и насочете се кон висините, нашите планини ве очекуваат за да се разладите.