Познатите британски ѕвезди Синтија Ериво и Мет Лукас беа меѓу главните гости на свечената церемонија одржана во замокот Виндзор, каде што примија високи државни почести лично од принцот Вилијам. По добивањето на медалите, филмските и телевизиските икони со гордост позираа пред камерите во дворот на замокот, покажувајќи ги своите нови признанија, пишува „Дејли мејл“.

Триесет и деветгодишната Синтија Ериво, која во моментов е актуелна на театарските сцени во Вест Енд со својата монодрама „Дракула“, беше прогласена за Член на Редот на Британската Империја (MBE) за нејзиниот вонреден придонес во музиката и драмата. Оваа Бродвеј ѕвезда, најпозната по улогата на зелената вештерка Елфаба во филмската адаптација на мјузиклот „Злобница“ каде глуми покрај Аријана Гранде, за свечениот настан избра впечатлива модна комбинација со црно структурирано палто, макси здолниште, ексцентрична капа и нејзините препознатливи долги нокти.

Ериво, својата кариера веќе има освоено Греми, Еми и Тони награди, а има и номинација за Оскар.

На истата церемонија, со титулата Офицер на Редот на Британската Империја (OBE) за заслуги во областа на драмата беше одликуван и популарниот комичар Мет Лукас. Педесет и двегодишниот Лукас е добро познат на јавноста како креатор на култните хумористични серии „Мала Британија“ (Little Britain) и „Полетај со мене“ (Come Fly With Me), кои ги создаде заедно со деловниот партнер Дејвид Валијамс, а во поново време и како водител на омиленото шоу „The Great British Bake Off“. Покрај холивудските и телевизиските лица, кралско признание (MBE) доби и младата спортска сензација, играчот на пикадо Лук Литлер. Литлер, кој минатата година влезе во историјата како најмладиот светски шампион во овој спорт на возраст од само 17 години, беше одликуван за неговиот огромен придонес и популаризација на пикадото на глобално ниво, заокружувајќи го овој ѕвезден ден во палатата.