Новак Ѓоковиќ по 10 пат во кариерата се пласираше во финалето на „УС Опен“, откако во првото полуфинале го совлада младиот Американец Бен Шелтон со 3:0 во сетови 6:3, 6:2 и 7:6 (4).

Во мечот кој траеше два часа и 40 минути, српскиот тенисер од почетокот покажа голема разлика во квалитет, сè до крајот на третиот сет, кога Американецот дојде од 4:2 на 5:4, а потоа и до се топка.

Ѓоковиќ ја спаси сет топката, па направи нов брејк, но потоа на свој сервис пропушти меч топка, па се отиде во тај-брејк, во кој Ноле беше подобар со 7:4.

Со пласманот во рекордното 10 финале, Ѓоковиќ доби можност да се бори за својата четврта титула во Њујорк, 24-та Грен слем во кариерата. За него мечот против Шелтон беше 100-ти јубилеен на „УС Опен“ и 87 победа.

Иако сите очекуваа ново финале годинава меѓу Новак Ѓоковиќ и Карлос Алкараз, тоа не го дозволи Данил Медведев во второто полуфинале.

После три часа и 22 минути игра, Русинот Медведев, третиот светски рекет, го елиминираше Шпанецот со 3:1 во сетови 7:6 (3), 6:1, 3:6 и 6:3.

Ѓоковиќ и Медведев меѓу себе до сега одиграа 14 мечеви, и моментно води Србинот со 9:5. Финалниот меч е закажан за в недела од 22.00 часот по македонско време.