Заборавете на мокри раце и борба со ветерот – овој чадор не го држите вие, туку тој „ве носи вас“. Иновативното решение доаѓа од Канада и го спојува класичниот чадор со современа дрон-технологија, создавајќи лебдечка заштита од дожд што ве следи на секој чекор, пишува „Интрестинг инженеринг“.

Јутјуберот и иноватор Џон Си, познат по каналот „I Build Stuff“, го создаде чадорот кој лебди над корисникот и се движи самостојно, без потреба да го држите. Каналот има над 150.000 следбеници, а токму овој изум привлече особено внимание бидејќи изгледа како да е излезен од научно-фантастичен филм.

Во центарот на идејата се наоѓа мал квадкоптер-дрон поставен под куполата на чадорот. Опремен со сензори, камера и систем за автономно управување, уредот прецизно го следи движењето на човекот и секогаш останува позициониран над главата, штитејќи го телото од дождот.

Технологијата му овозможува на дронот да ја препознае позицијата на корисникот дури и при слаба осветленост. Системот во реално време пресметува каде се наоѓа лицето и испраќа инструкции за летот, така што чадорот останува точно центриран додека човекот се движи.