ВИДЕО: Барди повторно тренира, Ристовски негативен на ковид-19
Добри информации доаѓаат за македонската А репрезентација кога се во прашање две клучни имиња во составот и кои настапуваат во странство.
Минатиот месец нашата сениорска селекција оствари историски успех со пласманот на Европското првенство кое ќе се одржи следната година.
Енис Барди ги пропушти последните три меча, против Грузија, Естонија и Ерменија, а причина беше повредата на `рбетот.
Последниот настап за Леванте го имаше на 8 ноември во шпанската „Ла Лига“ против Депортиво Алавес, а ги пропушти наредните четири дуели со Елче, Реал Ваљадолид, Хетафе и последниот вчера на „Камп Ноу“ со Барселона. Клубот од Валенсија во текот на денешниот ден на официјалниот Твитер профил објави видео од Барди кој повторно тренира, засега индивидуално, а секако се надеваме дека наскоро повторно ќе го видиме и на натпреварите.
Como nos gusta ver a @enisbardhi10 sobre el verde ?#OrgullGranota ? pic.twitter.com/Xay9lW7HJB
— Levante UD ? (@LevanteUD) December 14, 2020
Стефан Ристовски настапи на сите три последни меча за А репрезентацијата, а по одигрувањето на истите нашиот дефанзивец на 19 ноември беше објавено дека е позитивен на ковид-19.
Португалските медиуми денеска известуваат дека Македонецот се опорави од коронавирусот и може да се фокусира на клупските обврски во Спортинг Лисабон.
Изминатите неколку месеци се шпекулира дека Ристовски не е повеќе во плановите на тренерот на португалската екипа Рубен Аморим и дека се поврзува со можен трансфер во Русија.
И додека е таква „статус-кво“ ситуација, можеби и до моментот доколку се одлучи за нов клуб, ќе тренира со Б тимот на Спортинг Лисабон.