Одбојкарската репрезентација на Македонија го доживеа и третиот пораз на Европското првенство, овој пат подобар од избраниците на селекторот Душко Николиќ беше селекцијата на Турција.

Добро познатиот противник дојде и до третата победа откако во Тампере, Финска во рамки на третото коло во групата Ц славеше со убедливи 22:25,12:25, 15:25  и притоа парираа и добро одиграа само во првиот сет.

Македонија поведе со 3:0, но Турција прави серија од 1:7 и ја презеде контролата на резултатот. Турците постојано имаа еден до 2-3 поени предност и сите напади на македонските одбојкари да ја вратат резултатската неизвесност ги одбија и на крајот славеа со 22:25.

Вториот сет одбојкарите катастрофално го започнаа и имаа негатива од 0:6. Блокот и сервисот на Турците одлично функционираше и тоа ги деморализира избраниците на селекторот Душко Николиќ, а сетоа тоа најдобро го отсликуваше резултатот (3:13,5:19,8:21) а на крајот сетот да заврши со убедливи 12:25.

Третиот сет започна слично на првиот, Македонија поведе со 2:0, но Турците експресно ја вратија резултатската неизвесност. Одбојкарите успеваа да им парираат на расположените турски одбојкари до 10:8 по што следеше неверојатна серија од 0:12 на противникот кој поведе со 11:20 и ги разреши сите дилеми околу победникот.

Најдобар во редовите на Македонија беше Филип Маџунков со седум освоени поени, додека Ѓорѓиев и Љафтов освоија по шест поени.