Легендарниот музичар Пол Макартни откри дека Јоко Оно еднаш му рекла дека мисли оти нејзиниот сопруг, Џон Ленон, „можеби бил геј“. Оно и Ленон беа во брак од март 1969 година сè до трагичната смрт на Ленон на 8 декември 1980 година, пишува „Дејли Мејл“.

Во интервју за „Верајети“, направено во 2015 година, а повторно објавено минатата недела по повод документарецот „Човек во бегство“ за животот на Макартни по распадот на „Битлси“, тој раскажа дека Јоко му ја споделила таа претпоставка кратко по смртта на Ленон.

„Се колнам дека ме повика кратко по смртта на Џон и ми рече: ’Знаеш, мислам дека Џон можеби бил геј‘. Јас ѝ одговорив дека не сум сигурен. Реков дека не мислам така, барем не додека го познавав“, изјавил Макартни.

Тој додаде дека во 60-тите години двајцата поминувале многу време заедно и биле опкружени со многу девојки, па затоа немал причина да верува во таквите тврдења.

„Често спиевме во иста просторија кога патувавме, но никогаш немаше ништо такво, ниту гест, ниту некаков знак“, додал тој.

Сепак, Макартни призна дека слушал гласини за сексуалноста на Ленон, особено поврзани со нивниот поранешен менаџер Брајан Епштајн, кој бил геј. Но, тој истакна дека лично не верува дека меѓу нив се случило нешто.

Ленон и Оно се венчаа во март 1969 година и останаа заедно до 1980 година, кога Ленон беше убиен на 40-годишна возраст од опседнатиот обожавател Марк Дејвид Чепмен.

Двојката има син, Шон Оно Ленон, роден во 1975 година. Ленон претходно го доби и синот Џулијан Ленон со својата прва сопруга Синтија Ленон.

Во меѓувреме, Јоко Оно има и ќерка, Кјоко Оно Кокс, од бракот со режисерот Ентони Кокс.

Макартни проговори и за распадот на „Битлси“

Во последно време Макартни повторно е во центарот на вниманието поради новиот документарец кој го следи неговиот живот по распадот на бендот.

Во разговор со режисерот Морган Невил, 83-годишниот музичар призна дека во минатото ги прифатил критиките дека токму тој го распаднал легендарниот бенд.

„Кога ќе слушнам некој да го критикува Пол Макартни, често се согласувам со тоа. Кога сите зборуваа дека јас ги распаднав ’Битлси‘ и дека сум бил премногу наметлив, некако почнав да верувам во тоа“, изјави тој.

Макартни исто така призна дека се почувствувал многу емотивно кога во документарецот повторно ја видел својата покојна сопруга Линда Макартни, која почина во 1998 година.

„Да се гледам себе со Линда е нешто многу посебно, бидејќи таа повеќе не е тука. Тоа е како целиот живот да ти поминува пред очи“, рече музичарот.