Што е пролетната депресија и зошто се јавува кога природата е полна со енергија?
И покрај сонцето и подолгите денови, многумина забележуваат дека во пролет не се чувствуваат онака како што очекуваат. Се јавува замор, слабост или пад на расположението, па се поставува прашањето зошто се случуваат овие промени и колку е нормално телото и психата да реагираат на сезонските премини, особено кога околината „наметнува“ чувство на ведрина.
Препорачано
Психијатарот Ирена Ѓорѓевиќ објаснува дека е важно да се направи разлика меѓу пролетната малаксаност и пролетната депресија. Според неа, малаксаноста е природна реакција на организмот додека се прилагодува на новите услови, пренесува „Еуроњуз“.
Пролетната депресија, пак, претставува посложена состојба. Таа не е само краткотрајна тага, туку вклучува општ пад на волјата, неможност да се почувствува задоволство, нарушен сон и други симптоми што влијаат на целокупното психичко функционирање. За да се смета за депресија, овие симптоми треба да траат подолго од две недели и да бидат придружени со дополнителни проблеми како нарушена концентрација, промени во апетитот или спиењето.
Таа посочува дека е нормално човек да биде нерасположен ако поминува низ тежок период или загуба. Но, ако тагата е несразмерна со причината, трае подолго или се појавува без јасен повод, тогаш може да укажува на подлабок проблем.
Кога станува збор за пролетната малаксаност, телото има способност да се приспособи, но за тоа е потребно време. Во овој период луѓето може да се чувствуваат пораздразливи, да се будат уморни и покрај подолгиот ден, и да имаат чувство дека „би требало“ да се посреќни поради будењето на природата.
Причината за тоа се и биолошките промени во организмот – доаѓа до намалување на мелатонинот и осцилации во серотонинот и допаминот. На телото му треба краток период за да се усогласи со новиот ритам.
Дополнително, мислите дека „треба да сме расположени“ можат да создадат притисок, анксиозност и чувство на вина.
Заклучокот е дека пролетниот замор е нормална и минлива појава. Но, ако симптомите траат подолго или се влошуваат, тоа може да биде знак за посериозна состојба и е важно да се побара стручна помош и да се разговара за проблемот.
