Потрагата по новиот агент 007 сè уште трае, а челниците на „Амазон МГМ Студио“ на настанот „СинемаКон“ конечно проговорија за тоа кога фановите можат да го очекуваат следното поглавје од култната франшиза. Откако студиото ја презеде креативната контрола врз серијалот, ангажирањето на Денис Вилнев, режисерот на „Дина“, за следното продолжение наиде на огромни пофалби, пишува „Гардијан“.

Покрај него, за сценариото ќе биде задолжен креаторот Стивен Најт, што поставува високи очекувања за новиот филм.

Кортни Валенти, шефица на филмскиот оддел во студиото, истакна дека процесот на избирање на новиот Бонд се прави со голема внимателност и длабоко почитување кон наследството на ликот.

„Знам дека сите се прашувате кој ќе го глуми Џејмс Бонд. Немојте премногу да се возбудувате, бидејќи ова го правиме со огромна грижа. Сон на животот за сите нас е да го донесеме следното поглавје пред публиката, и тоа е одговорност која не ја сфаќаме лесно“, порача Валенти.

Иако не открија конкретно име, од студиото порачаа дека кога ќе се спојат врвен режисер како Вилнев и моќен продуцентски тим, темелите за нешто достојно за Бонд се веќе поставени.

„Филмот доаѓа, а кога ќе биде правото време, ќе имаме многу повеќе информации за споделување“, додаде таа.

Шпекулациите постојано растат, а во холивудските кругови најгласни се гласините за имиња како Џејкоб Елорди, Калум Тарнер и Луис Партриџ, пишува „Пипл“. Кој и да ја добие улогата, ќе има тешка задача да го наследи Даниел Крејг, чии пет филмови, вклучувајќи ги „Скајфол“ и „Казино ројал“, беа комерцијални и критички врвови на серијалот.

Крејг официјално се прости од улогата со филмот „Нема време за умирање“ во 2021 година, и оттогаш светот со нетрпение чека да види кој следниот ќе го облече најпознатиот смокинг во светот на филмот.