Состојбата на Мадона беше толку сериозна што нејзините роднини „се подготвуваа за најлошото“, изјави член на семејството за „Дејлимеил“.

Мадона со недели напорно вежбаше за нејзината „Слебрејшн тур“ (Celebration Tour), турнеја на која требаше да прослави 40 години од нејзината кариера, но за жал, не успеа да ги реализира плановите бидејќи итно беше хоспитализирана.

Сега нејзиниот роднина се огласи по веста дека 64-годишната кралица на попот е итно пренесена во болница.

„Изминативе денови никој не знаеше во која насока ќе оди ова, ситуацијата беше толку сериозна што се подготвувавме за најлошото. Затоа од саботата сè чувавме во тајност. Верувавме дека можеме да ја изгубиме, изјави роднината на Мадона.

„Ова беше шок. Мадона верува дека е непобедлива и сериозно се подготвуваше за турнејата, но се префорсира“, додаде тој.

Во средата, нејзиниот менаџер Гај Осери објави дека пејачката боледува од „сериозна бактериска инфекција“ и дека ѝ треба време да се опорави, па затоа ја одложи нејзината турнеја, која требаше да започне во Ванкувер на 15 јули.

Мадона беше пронајдена во својот дом во Њујорк минатиот викенд, онесвестена и итно беше пренесена во болница.

Завршила на интензивна нега каде била интубирана и сега е будна и закрепнува. Нејзината ќерка Лурд е постојано со неа.