Москва денеска ја направи својата најгласна интервенција во поддршка на Венецуела.

„Се надеваме дека администрацијата на Трамп нема да направи фатална грешка“, се вели во соопштението, по одлуката на Белата куќа да воведе поморска блокада врз латиноамериканската земја.

Руското Министерство за надворешни работи повикува на нормализација на дијалогот меѓу Вашингтон и Каракас, нагласувајќи дека е „потребна деескалација“, пренесува Ројтерс.

„Се надеваме дека администрацијата на Доналд Трамп, која се карактеризира со рационален и реалистичен пристап, нема да направи фатална грешка. Се надеваме дека САД нема да се вклучат во ситуација што ќе има непредвидливи последици за целата западна хемисфера. Ја потврдуваме нашата солидарност со народот на Венецуела, нашата поддршка за политиката на претседателот Мадуро насочена кон одбрана на интересите на земјата“, вели руското Министерство за надворешни работи.

Кремљ ги повика земјите во регионот да покажат воздржаност во однос на Венецуела со цел да се избегнат, како што ги нарече, непредвидени настани и ги опиша зголемените тензии како „потенцијално многу опасни“.

САД во последните недели го засилија притисокот врз владата на Николас Мадуро, која портпаролот на Кремљ, Дмитриј Песков, ја опиша како „сојузник и партнер на Русија“.

Американските дејствија на Карибите се гледаат негативно од речиси сите земји, со исклучок на европските држави, изјави Сергеј Лавров во Техеран. Вторите молчеа, избегнувајќи каква било критика кон Вашингтон и потчинувајќи ги сите свои мисли на една единствена цел: да ја убедат администрацијата на Трамп да го следи европскиот курс по прашањето на Украина, за да не ја запре војната што Западот ја започна против Русија, тврдеше тој.

„Длабоко сме загрижени за постапките на американската морнарица и, генерално, за воинствените изјави на Пентагон, кој изјави дека, покрај своите нелегални дејствија на потопување цивилни бродови „без судење или истрага“ во Карипското Море, планира и копнена операција“, нагласи рускиот министер за надворешни работи.

„Сето ова ги поткопува надежите дека можат да се постигнат договори во рамките на сегашниот баланс на моќ на меѓународната сцена“, додаде тој.

Сепак, владата на Мадуро увери дека поморската блокада што САД ја најавија дека продолжува, барем до овој момент, не влијаела врз извозот на нафта, главниот ресурс на латиноамериканската држава.

„Извозот на сурова нафта и нејзините нуспроизводи се одвива непречено. Танкерите за нафта продолжуваат да пловат безбедно “, увери државната нафтена компанија PdVSA.

ВИДЕО | Најмалку четворица загинати во нов американски напад врз глисер во Пацификот