Ролан Гарос: Успешен старт на Надал и Серена Вилијамс
Бранителот на трофејот, Рафаел Надал, оствари рутински триумф Јегор Герасимов од Белорусија во три сета со 6:4,6:4,6:2 и го започна походот на 13. титула на Ролан Гарос.
Првите два сета, Надал ги доби на речиси идентичен начин, со по еден брејк, во првиот сет тој направи брејк во петтиот гем, додека во вториот сет брејкот се случи во третиот гем.
Во третиот сет рутински Надал дојде до убедливи 6:2 и пласман во второто коло каде го очекува Американецот Мекензи Мекдоналд кој е 236. на АТП ранг листата и во првото коло беше поуспешен од Канаѓанецот Дијез во четири сета.
Дербито на првото коло на Ролан Гарос беше помеѓу шампионот од УС Опен, третиот носител Доминик Тим и Хрватот Марин Чилиќ. На крајот Тим оствари лесен триумф во три сета (6:4,6:3,6:4). Норвежанецот Каспер Руд продолжува со одличните игри и во првото коло со 6:1,6:3,6:1 го победи Јапонецот Сугита.
Мало изненадување претставуваа елиминациите на домашниот тенисер Гаел Монфилс од Бублик во четири сета (6:4,7:5,3:6,6:3) и на талентираниот Канаѓанец Оже-Алиасим кој е поразе од Нишиока.
Кај дамите, Серена Вилијамс по неизвесниот прв сет кој го доби во тај брејкот, во вториот сет не загуби ниту еден гем во дуелот со сонародничката Ан.
Тај брејк во првиот сет играше и Елена Свитолина која е трета носителка против Русинката Грачева, но работата ја заврши во два сета (7:6,6:4). Поранешната шампионка на Ролан Гарос, Гарбине Мугуруза многу потешко од очекувањата со 7:5,4:6,8:6 ја победи тенисерката од Словенија, Тамара Зиданшек.