Симеон ги открива главните нуспојави…

Британецот Симеон Корти гостуваше во емисијата „Добро утро Британија“ со цел да открие зошто доброволно се пријавил за тестирање на вакцината за КОВИД-19 како и тоа кои се споредните ефекти од оваа вакцина.

Корти е еден од 500-те волонтери кои помагаат во првото европско тестирање на вакцините на луѓето, а кое се врши во Оксфорд, а скромно вели дека „тој е само мал дел од проектот“.

Симеон, писател и поранешен ТВ водител, раскажа дека постојат одредени несакани ефекти на вакцината, како што се симптомите слични на грип и болките во телото, кои не би требало да траат подолго од неколку денови.

– Пробното тестирање започна, но првата вакцинација ќе биде следната среда. Научниците веруваат дека ќе искусиме симптоми слични на грип. Веројатно ќе имаме и други благи нуспојави, а во најлошиот случај ќе имаме неколку денови болки, открива Корти.

По првата вакцина, Симеон, во зависност од тоа во која група припаѓа, ќе прими уште една или две вакцини.

Тестирањето е поделено во две групи, едната група прима вакцина против новиот коронавирус, а другата против менингитис. Испитаниците нема да знаат во која група се, бидејќи и двете вакцини предизвикуваат слични нуспојави.

– Нема плацебо група, каде ќе добиете нешто како вода со шеќер. Или ја добивате вистинската нова вакцина која ја развиваат или вакцината која веќе е одобрена – онаа која им се дава на тинејџерите да ги заштити од менингитис, истакна Симеон.

Корти многу скромно објаснува дека себе си не се доживува како херој и дека волонтира исклучиво да им помогне на луѓето.