Премиерот на Есватини (поранешен Свазиленд), Амброз Дламини (52) е првиот светски лидер кој почина од ковид-19. Смртта кај него настапила по две недели од итната хоспитализација во болница во Јужна Африка.

Дламини беше позитивен на тест за ковид-19 во средината на ноември, но тогаш се говореше дека се чувствува добро и дека спаѓа во асимптоматски случаи. Меѓутоа, неговата состојба се влоши, па итно беше примен во болница во соседна Јужна Африка.

Официјалната причина за смртта сè уште не е соопштена, но, сепак, се верува дека дошло до компликации по инфекцијата со коронавирусот.

Есватини има околу еден милион жители, меѓу кои досега се забележани 6.768 заразени лица со ковид-19 и 127 смртни случаи, според тамошното Министерство за здравство, што се поврзани со пандемијата.