Американскиот технолошки гигант „Мета“ планира да воведе нови верзии со претплата на своите најпопуларни платформи – Фејсбук, Инстаграм и Ватсап.

Под имињата „Фејсбук плус“, „Инстаграм плус“ и „Ватсап плус“, на корисниците ширум светот ќе им бидат понудени дополнителни функции и ексклузивни содржини, објави во среда главниот директор за производи на компанијата Мета, Наоми Глајт, во видео објавено на Инстаграм, пишува „Феникс магазин“.

Со овој потег, Мета има за цел да ја намали својата зависност од приходите од рекламирање и да отвори нови извори на приход преку бизнис моделот со претплата. Според Глајт, корисниците кои се претплатуваат на „Инстаграм плус“ и „Фејсбук плус“ ќе добијат пристап до напредни алатки за аналитика, подетални статистики за преглед на инстаграм-приказна и дополнителни опции за персонализација на профилот.

Од друга страна, „Ватсап плус“ ќе се фокусира првенствено на персонализирање на корисничкото искуство. Меѓу најавените функции се премиум налепници и прилагодливи мелодии за ѕвонење. „Мета“ сè уште не објавила комплетен список на функционалности што ќе бидат достапни во рамките на новите пакети за претплата.

Иако официјалните информации за цените сè уште не се потврдени, неколку медиуми објавуваат дека претплатата за „Инстаграм плус“ и „Фејсбук плус“ треба да биде 3,99 долари месечно, или околу 3,40 евра. Според извештаите, цената на „Ватсап плус“ е 2,99 долари месечно.

„Мета“ планира да ги обедини сите „плус“ услуги под еден бренд наречен „Мета уан“ на долг рок. Компанијата воведе верзии без реклами на Фејсбук и Инстаграм во Европа уште во 2023 година, како одговор на построгите регулативи на Европската Унија за приватност и користење на кориснички податоци.

Европските корисници оттогаш можат да избираат помеѓу бесплатна верзија на платформите со персонализирани реклами и платена верзија без реклами. Со воведувањето на новите пакети, „Мета“ сега дополнително ја проширува својата понуда за претплата, стремејќи се да изгради поодржлив бизнис модел кој нема да зависи само од рекламирање.